INTRODUCCIÓN
A saúde, ademais de ser un aspecto clave da vida das persoas, tamén é, cando
considerámo-lo conxunto da poboación, un índice do grao de desenvolvemento
dos pobos e do benestar acadado por estes.
Os logros acadados na área da saúde en España e en Galicia en particular son
elevados, tanto en termos de dispoñibilidade de asistencia sanitaria como de
nivel de saúde da poboación como veremos, e é desexable que se manteñan ou
melloren malia as ameazas que xorden na súa contra.
Este relatorio de sanidade, co horizonte temporal do ano 2010, concibiuse como
unha reflexión acerca daqueles grandes aspectos que poden afectar a este
benestar na área da saúde.
Para iso, o relatorio estructúrase cunha primeira parte na que se presenta cál
é a situación actual e o escenario previsible nos próximos anos en aspectos
sobre os que se ten pouca ou ningunha capacidade de modificación como poden ser
aspectos demográficos e tipo e cantidade de patoloxía que se vai atender nos
anos vindeiros. Incorpóranse algúns elementos que, previsiblemente,
evolucionarán no sentido que se indica no relatorio pero sobre os que existe
algunha posibilidade de acelerar ou retardar esa evolución se considera
desexable. Este é o caso do perfil do cidadán ou do paciente en termos de grao
de coñecemento de temas de saúde e participación nas decisións individuais
ou colectivas que poden afecta-la súa saúde.
A sanidade é un sector en continuo cambio desde o punto de vista das novas
tecnoloxías, e neste momento tal vez máis que en ningún outro da historia. Na
segunda parte do relatorio inclúense aqueles aspectos tecnolóxicos de recente
ou próxima dispoñibilidade, tanto na área de novas posibilidades e
necesidades diagnósticas e terapéuticas como noutras, e que se pensa que poden
presentar maiores retos na sua incorporación á atención sanitaria pero que
tamén, no caso de aproveitarse axeitadamente, ofrecen maiores oportunidades
para ser utilizados como ferramentas que xoguen ó noso favor na mellora da
atención sanitaria.
En último lugar, debido ó convencemento do relatorio de que no punto ó que
chegamos e coas previsións de futuro existentes son necesarios cambios
organizativos, discútense diferentes posibilidades que poden mellora-la atención
sanitaria á poboación e que, en ocasións, se apoian nas oportunidades que
achegan as novas tecnoloxías dispoñibles. A análise céntrase no sistema
sanitario público, pero o sector da sanidade privada, cun papel complementario
do sistema público, non será alleo ós grandes movementos que se describen e
tamén deberá facer fronte ós retos de innovación tecnolóxica e
organizativa.
Para que este documento poida ser útil, nos temas tratados, onde sexa de
aplicación, xúntanse recomendacións (destacadas en cursiva no texto) para as
autoridades correspondentes encamiñadas a mellora-la atención sanitaria á
poboación galega e, en último extremo, a saúde global desta poboación.
Intentouse que as recomendacións sexan realistas desde tódolos puntos de vista
no contorno galego, incluído o económico. Se ben non se realizou ningúnha análise
formal de custos das recomendacións que se fan, o relatorio é consciente que
os movementos que se perciben van supoñer un incremento das necesidades de
financiamento e investimento. As melloras na xestión e en eficiencia non son
suficientes para cubrir economicamente o custo da innovación e a calidade na
sanidade, conceptos claves ó longo do relatorio.
Para a realización deste relatorio o seu Presidente tivo liberdade absoluta á
hora de selecciona-las persoas integrantes desta. Ademais de seleccionar a
persoas coñecedoras da situación da sanidade galega, coidouse que o relatorio
o constituíran profeisonais procedentes de áreas moi diversas, para que
puideran xuntar puntos de vista variados. Nembargantes, por razóns de
operatividade, foi necesario limita-lo número de individuos para compoñe-lo
relatorio, o que impediu incluír a moitos outros candidatos calificados.