I. SUMARIO

    Este estudio céntrase de forma xeral sobre a agricultura galega e a súa industria. Nel resúmese tanto o contorno coma os sectores productor, industrial e comercial deste ámbito estratéxico da nosa Comunidade Autónoma.

    O contorno da agricultura galega atópase marcado polo abandono do medio rural da poboación, a alta idade media dos granxeiros, a desprofesionalización xeneralizada que existe no sector e as tendencias liberalizadoras e globalizadoras impostas pola PAC e a OMC (Organización Mundial do Comercio).

    Galicia é unha rexión eminentemente agrícola. O subsector con maior peso dentro da nosa agricultura continúa a ser o vacún, especialmente o do leite. Este sector encóntrase sumido nun proceso de reestructuración para aumentar a rendibilidade das explotacións que está producindo unha importante contracción do número destas. A este subsector séguenlle en importancia o porcino e o avícola.

    A comercialización agraria pasou a ser unha das partes máis importantes dentro do sector. Coa reducción das axudas resulta imprescindible a adecuada colocación da producción nos distintos mercados.

    A agricultura galega está marcada, fundamentalmente, polo cooperativismo como sistema organizativo. Para que as empresas deste segmento continúen a crecer e desenvolver a súa actividade cómpre que a lexislación sobre cooperativas se adecúe ás súas necesidades, do contrario o capital desprazarase cara a ámbitos máis rendibles, co conseguinte prexuízo para este sector primario, básico na nosa economía.